Ang Davao Mission (DM) Health Ministries inabagan sa Adventist World Radio (AWR), Adventist Hospital Davao (AHD), Adventist Health Professionals dinhi sa rehiyon sa Davao (AHPD) ug uban pang health volunteer groups nagpahigayon sa Health Caravan and Health Expo sa upat ka mga dapit nga nakaalagad og 1,186 ka mga kaigsoonan ug kahigalaan.

225 ka katawhan ang napanalanginan sa Barangay 31-B, Piapi Boulevard, Davao City niadtong Marso 20 samtang adunay 145 ka mga bata og hamtong ang naalagaran didto sa Purok Tiger Mama, San Isidro, Bunawan niadtong Marso 21.

Nagpadayon ang serbisyo medical didto sa Davao Central SDA Elementary School Gym sa Olive Road, Bajada, Davao City niadtong Marso 24 nga nakaalagad og 357 ka katawhan nga tinambongan nila former Ambassador to Malta, Hon. Kathryn Linda Haycock Proffit nga registered dental hygienist, maoy miabag sa kang Dr. Merry Joy Estocada, head sa AHD Dental Care Division sa pagpangibot sa ngipon.

Kauban sa maong katiguman mao sila Pr. Kyle Allen, ang Bise Presidente sa AWR sa tibuok kalibutan, Pr. Danielo Palomares, Presidente sa kinatibuk-ang buhat sa Adventist Church sa Mindanao, Pr. Robert Dulay, AWR Special Projects Coordinator, Pr. Ephraim Pitogo, SULADS President, ug tanang health directors sa tibuok Mindanao nga nagrepresentar sa walo ka mga missions ug conferences.

Samtang niadtong Marso 26, nakaalagad ang programa sa 459 ka mga kaigsoonan ug kahigalaan didto sa Digos City Gymnasium, Digos City.

Pinasiugdahan ni Pr. Geronimo Jose, Health and Stewarship Director sa Davao kini gipangunahan sa Adventist Hospital Davao, uban sa ilang Presidente, Dr. Nestor V. Molleda, ug sa ilang nagkalain laing departamento. Gawas pa niini, niduyog ang mga ministro sa DM ug medical volunteers, kauban ang suporta sa Davao City Dental Chapter pinanguluhan ni Dr. Marie Iris Q. Celis nga ilang president ug ang mga private optometrists sama nila Dr. Marilou Lantaya Mesmis ug Dr. Eloiza Temperatura.

Gitanyag sa tanan ang libreng medical check-up, ibot sa ngipon, blood sugar test, tuli, libreng antipara, fluoride varnish application sa mga bata (5% sodium fluoride), lektura sa maayong panglawas, nutrition cooking demonstration, medical advice, libreng gupit ug daghan pang uban kauban ang medical team sa atong kapulisan ug kasundalohan.

Daku ang kalipay ug pasalamat ni DM President Pr. Reynaldo Merin sa tanang miabag sa pagministryo ni Hesus nga “nagtudlo Siya sulod sa ilang mga sinagoga, nagwali sa Maayong Balita bahin sa paghari sa Dios ug nag-ayo sa mga masakiton.” Mateo 4:23

Si Ellen G. White isip usa sa nagapalig-on sa simbahan pinaagi sa iyang mga sinulat, nag-ingon: “Usa kini ka taas nga katungdanan ug bililhon nga pribilihiyo sa pagmisyonero sa pagpanambal. Ug ang personal nga pagministeryo kasagaran magaandam og dalan para niini. Ang Dios nagakab-ot sa kasingkasing pinaagi sa atong panlimbasog sa paghupay sa pisikal nga pag-antus sa uban.” Ministry of Health and Healing 74:1 (Dan Florante Callo/DM Communication)

#DMAdventists #DavaoMission #DavaoAdventists #GetInvolved

[More Medical Mission photos here >> https://tinyurl.com/ybfsauxb ]