Davao Mission midu-aw sa My Journey With God broadcast partners

October 28, 2022 • in News & Events

Atol sa talitapos nga sibya sa “My Journey With God”, gilibot ni Davao Mission Communication ug Media Director ang tanang media partners sa Davao del Sur nga nahimong hook-up stations sa AWR 104.3 HopeRadio Davao tungod sa handom nga mapakaylap ang maayong balita sa tanang katawhan sa bisan asang dapit, hilabi na sa teritoryo sa Davao Mission (DM).

Isip broadcast partners sa “The Amazing God of Revelation” ug “My Journey With God,” gibisita ug gipasalamatan ang 96.5 DXPT-FM Radyo Ronda – Padada; 96.3 DXET Radyo Bandilyo – Sulop; ug DXJT-FM 102.1 RockFM – Matanao, mga istasyon sa radyo nga gidumala ug gipanag-iyahan ni Sir Edgardo Tagalog, nga nagpagamit usab sa pagpakaylap sa maayong balita.

Gibisita usab sa grupo ang DXDS 92.7 FM ug 1161 AM Radyo Ukay sa siyudad sa Digos nga gidumala ni Sir Ramon Sibya ug nahimamat didto si Gng. Carmen Abajero, usa ka brodkaster nga retiradong English teacher ug presidente sa DavSur Media Association. Iyang gidapit ang mga Hope Channel management sa pagsalmot sa grupo aron makatabang sa moral recovery program ug mental health awareness nga pagsibya diha sa radyo. Nipadayon ang grupo sa pagbisita sa Radyo Katribu DXAA-FM 99.3 nga nahimutang sa Magsaysay, Davao del Sur.

Sa maong byahe, nidalikyat ang grupo sa nasugdang proyekto sa Lanuro Adventist Church, sa gina-andam nga luna alang sa pagbalhin sa operasyon sa AWR 107.1 HopeRadio Davao del Sur. Mahinumduman nga ang kanhing studio nga nahimutang sa South Philippine Adventist College (SPAC) campus naguba sa linog kaniadtong Disyembre 2019. Sa kasamtangan ginahulat na lamang ang mga papeles kalabut sa Permit to Construct, Permit to Purchase, ug Permist to Operate sa bag-ong lokasyon ug gilaumang mas-lapad ang mahimong coverage sa pagsibya.

Mabulokon usab ang pakighimamat sa mga kawani sa BansalanCable TV ubos sa pagdumala ni Mrs. Emily Mangulabnan, nga sa dugayng panahon, libre nga gipagamit ang pagsibya sa tanang programa sa HOPE Channel Davao. Dugang usab niini, siya naghandum nga madugang ang Hope TV International broadcast sa ilang channel assignments.

Sa tibuok biyahe, anaa kanunay ang mga district leaders ug pastors aron sa pagtunol sa mga regalong mga libro gikan sa Publishing department ug snacks pinaagi sa maayong kabubot-on sa MissionFoods, ug labaw sa tanan, sa paghalad og pag-ampo alang sa mga tigdumala niining mga estasyonan nga nahimong kabahin sa atong pagsangyaw sa gugma ni Kristo.

Salamat sa presensya nila Pr. Ranel Fortich sa Digos Central; Pr. Ciro Nebato sa Padada; Pr. Jasper Delgado sa Sulop; Pr. Edmond Basco sa Magsaysay, ug Pr. Evan Rey Basia sa Matanao nga nagtultol usab kanamo sa panimalay sa magtiayong tigulang, nga iyang nahapitan sa iyang pagpasilong didto tungod sa ulan, nga si Tatay Jaime ug Nanay Nene, maikagong naminaw sa “My Journey With God” broadcast sa Radyo Ukay Digos, gikan sa ilang gamay’ng transistor radio, sukad pa sa una niining episode nga matud pa nila, “nahigugma mi pag-ayo sa maong programaha.”

Among gisipong ang tanang detalye sa ilang sugilanon, ug among ipahat sa sunod higayon, aron ikaw ug ako, dugang makadayeg sa gahum sa buhat media uban sa hikap sa Balaang Espiritu. (Dan Florante Callo/DM Communication)