Sa Nag-awit ang mga Anghel sa Tawantawan

November 22, 2022 • in Story of Hope

Ang Tawantawan usa ka hilit nga sitio sa Baguio District, Calinan, sa siyudad sa Davao ug dinhi nahimamat sa DM Communication Team si Tatay Jacinto Andoy, usa ka maabtik nga diakono sa Tawantawan Adventist Church.

Iyang giasoy nga ang isa sa iyang mga anak nga si Janice, naminyo og usa ka Adbentista nga si Edervin Prieto. Sigehan siyag hagad nga magpa-bible study apan wala siya misugot. Usa siya ka PSL o pangulo sa liturhiya sa dakong simbahan ug dili niya gusto biyaan ang iyang paboritong mga putaheng baboy ug ilimnong makahubog.

Apan sa wala niya damha nga panghitabo, nakasugot siyang magtoon sa bibliya kauban ni Pr. Harold Saavedra ug dayon gipulihan ni Bro. Ruben Salvani, nga taga Toril, ug Bro. Tony Pansacala, nga taga Davao del Sur. Tungod niadto, siya ug ang iyang asawa nga si Necitas Narido Andoy, ug kamanghurang anak lalaki, nabawtismohan ni Pr. Benhur Golosino niadtong Hulyo 26, 2010.

Nagpasalamat siya sa Ginoo kay nakapalit siyag payong-payong nga motor, kay maoy ilang sakyan magsimba sa Calinan Central Adventist Church, mga 15 kilometros gikan sa ilang balay. Nabalhin sila sa Paradise Adventist Church kay mas duol ra man didto ug samtang ginatukod pa ang iglesya sa Tawantawan, mibalhin silag simba sa iglesya sa Cadalian.

Sugod 2013, may nagdonar sa pagpalit sa lote, atup ug thrushes, may nagdonar sa tiles sa salog, ang mga Adbentistang mga magtutudlo sa Davao City midonar sa tiles sa pulpit ug usa ka Koreano mihatag ug dakong kantidad alang sa finishing touches sa simbahan. Daghang katingalahang panalangin nagaabot sa ilang iglesya diin ang ilang pangandoy nga simbahan, nangatuman.

Apan niadtong panahon sa pandemya, samtang wala pay bintana ug dingding ang gambalay sa iglesya, namatikdan ni Edervin Prieto, usa sa mga tigulang sa iglesya, umagad sab ni Tatay Jacinto, nga ang usa sa upat ka sakong semento nawala. Sa ilang pagsusi, may mga tunob padulong sa kasagbutan, diin sa unahan, atua ang semento nga nabungkag na kay daw gipusdak. Pipila ka adlaw ang milabay, nanabi ang mga nagkuha sa semento, ug nahimong sugilanon sa barangay, nga may taas nga tawo, maputi ug ambongan, nagbantay sa simbahan, busa ilang nabundak ang semento tungod sa hilabihang kahadlok.

Sa mosunod nga mga adlaw, samtang nagsag-ob og tubig si Diana Venice Prieto ug Keziel Mae Morano, mga apo ni Tatay Jacinto, ang ilang higala nga si Angelika, miingon: “Ninduta ninyo’g mga kanta kada-Biyernes sa gabii ba? Gilili gyud namo, hayag kaayo ang inyong simbahan.”

Uban sa katingala, si Diana ug Keziel mitubag, “Wala man mi gasimba kay bawal man tungod sa pandemic.”

Busa sa kadasig uban sa pagtoo nga ang mga anghel naghulip sa ilang pagsimba, ang mga kaigsoonan mibalik pagsimba didto, apan ang mga silingan tupad sa simbahan, naghawa didto kay wala nila masabtan ang mga katingalahan sa iglesya sa Tawantawan.

Duyog niini, usa ka Evangelistic Campaign ang ginaandam ug pagahimoon gikan Nobyembre 20 ngadto 26 kauban ang dinapit nga magsusulti nga si Pr. Elexiz Mercado, and Associate Director sa Adventist World Radio – Center for Digital Evangelism (AWR-CDE) nga maong buhatan nahimutang sa Cavite, Philippines.

Ang Ginoo dunay mga pamaagi nga dili nato masabtan pinaagi niini nga mga panghitabo apan nagpaila kini nga kanunay Siya anaa ug andam nga motabang ug mopanalipod sa Iyang mga katawhan. (DM Communication)

(𝘉𝘢𝘴𝘦 𝘴𝘢 𝘴𝘶𝘨𝘪𝘭𝘢𝘯𝘰𝘯 𝘯𝘪 𝘌𝘥𝘦𝘳𝘷𝘪𝘯 𝘗𝘳𝘪𝘦𝘵𝘰 𝘶𝘨 𝘑𝘢𝘤𝘪𝘯𝘵𝘰 𝘈𝘯𝘥𝘰𝘺 𝘶𝘣𝘢𝘯 𝘢𝘯𝘨 𝘮𝘨𝘢 𝘱𝘢𝘨𝘱𝘢𝘮𝘢𝘵𝘶𝘰𝘥 𝘴𝘢 𝘱𝘪𝘱𝘪𝘭𝘢 𝘬𝘢 𝘮𝘨𝘢 𝘮𝘪𝘺𝘦𝘮𝘣𝘳𝘰 𝘴𝘢 𝘛𝘢𝘸𝘢𝘯𝘵𝘢𝘸𝘢𝘯 𝘈𝘥𝘷𝘦𝘯𝘵𝘪𝘴𝘵 𝘊𝘩𝘶𝘳𝘤𝘩.)