SULADS Missionari Nanguna sa Little Baguio District Fellowship

December 7, 2022 • in News & Events

Lima ka mga iglesia sa Little Baguio, Malita, Davao Occidental mipahigayon sa joint worship kauban ang mga misyonerong SULADS gikan sa mga mission schools sa kabukiran sa Davao Occidental.

Nagtipon nianang adlawa ang mga miyembro sa mga iglesya sa Anggas, Kablulan, Nabol, Lalon 2 ug Centro Little Baguio. Nadasig ang tanan sa pagpaminaw sa mga kasinatian sa mga misyonerong SULADS gikan sa bukid sa Latian, Upper Managyabo ug Bagsak.

Ang SULADS, o “igsoon” sa pinulungang Manobo, may legal nga kahulugan nga Socio-economic Uplift, Literacy, Anthropological, and Developmental Services, usa ka misyonero hugpong nga gimugna sa Mountain View College niadtong 1968, aron moserbisyo sa mga komunidad nga walay eskwelahan, ug layo sa serbisyong medikal, espiritwal ug sosyal. Ang iyang mga misyonero mga estudyante sa MVC o gradwado sa bisan unsa nga kurso, nga andam mopuyo sa kabukiran kauban ang mga lumad o indihenong tribu aron motudlo, mogiya ug mosuporta alang sa ilang edukasyon, maayong panglawas, panginabuhian ug relasyon ngadto sa Ginoo.

Ang SULADS nahimong Most Outstanding Literacy Program of the Philippines, ABS-CBN Bayaning Pilipino Awardee ug giila sa atong senado ug kongreso isip kaabag sa gobyerno sa pag-atiman ug pagproteher sa atong mga pundok etniko. Kini nagsugod sa kabukiran sa Bukidnon, ug mikaylap ang iyang serbisyo sa tibuok Mindanao ug uban pang parte sa kalibutan. (Roy Estrera/DM Communication)