Adventist Community Services Dali-daling Miresponde sa Nabahaan sa Malalag

November 22, 2022 • in News & Events

Human sa makusog nga pagbaha sa Malalag, Davao del Sur niadtong Nobyembre 17, 2022, miduaw gilayon ang Adventist Community Service (ACS) sa Davao Mission ngadto sa apektadong mga Adbentistang pamilya dala ang hinabang pinansyal ug mga pag-ampo.

Pinanguluhan ni Pr. Rudy S. Esteban, DM Sabbath/Personal Ministries/ ACS Director, kauban ni Pr. Geronimo Jose, DM Health and Stewardship Ministries Director ug Hope Channel Team, gidala ngadto sa mga pamilya ang ginagmay’ng kantidad apan kinasingkasing nga gitagana sa kinatibuk-ang pwersa sa Davao Mission, pinanguluhan ni Pastor Edwin Magdadaro, ang atong Presidente nga bag-ong napili isip Executive Secretary sa South Philippine Union Conference, ug pagahulipan sa DM Ministerial Secretary Pr. Reynaldo Merin.

Isunod pa paghatod sa ubang kaigsoonang nabahaan ang sulusamang hinabang sa mosunod nga mga adlaw. Tungod kay wala kitay Harvest Ingathering sa pipila ka tuig, giprayoridad nato ang mga kaigsoonan nga apektado sa baha.

Gisaysay sa mga kaigsoonan ang nagkadaiyang kasinatian taliwala sa makusog nga ulan ug naghaguros nga tubig gikan sa nagsanga-sangang sapa sa Malalag. Si Bro. Edwin Falle, tag-iya sa dakung bakery, nahikurat sa pagsaka sa tubig sa alas 4:00 sa kaadlawon, ug aron luwason ang ilang kaugalingon, nag-ampo ug naggunitay sa kamot, hinayhinay nga gisungasong ang makalilisang nga bul-og sa tubig, dala ang tanang niluto nga pandesal, ug pag-abot sa luwas nga dapit, gipakaon nila ang tinapay sa mga evacuees nga gipanggutom. Giuna nila ang uban, bisag ang ilang tiyan hilabihan na kahapdos sa tumang kagutom bunga sa kahadlok ug pagpakigbisog. Pagbalik nila sa ilang patigayon, wala na ang mga harina, makina, appliances ug kagamitan kay gianod na sa makililisang nga baha.

Sa pagtuwak na sa ulan ug pagkunhod sa saag nga tubig gikan sa kasapaan, nagtapok sila sa iglesya nga nalunod usab sa baha, nag-ampo ug nagdinasigay sa adlaw sa Pagpangandam kauban nI District Pastor Godofredo Otero, nagpasalamat sa Dios nga walay bisan usa nga samaron o nawala, bisan ilang hayupan gitipigan sa Langitnong Amahan. Ug sa kahaponon sa wala pa ang Adlawng Igpapahulay, miabot ang mga pangulo sa iglesya dala ang salapi nga ikapalit og pagkaon, kay bisan daghan ang nawalang butang kanila, hulipan kini ni Jehovah og pilo-pilo nga panalangin, sama sa pag-amuma Niya kang Job ug sa balo sa Zarepath, sila nagatoo nga kining mga pagsulay, labing makapahiduol kanato sa Ginoo ug ang maong katalagman timailhan sa haduol nga pagbalik ni Hesus. (Godofredo Otero/DM Communication)